"Kahilangan Undas" Puisi Karya Fahmi Wahid

KAHILANGAN UNDAS

Karya : Fahmi Wahid

(Gasan Dangsanak Alm. Y.S. Agus Suseno) 

Asa malidup-lidup dada 

mandangar habar ikam bulik

balalu asa rawai-rawaian mataku

pahin kita tuhuk sarantang saruntung

pahin bapajam guring satikar salapikan

marutat lawan kakawalan samalamanan 

di bawah sindang kanaungan rampa Teater Pena

Babanaran kami kahilangan undas

siapa lagi nang manyambur nang badahi

siapa lagi nang mamadahi bakasanian

siapa lagi nang manjadi pingkutan pitua

siapa lagi nang manjaga sastra Banjar

sasain nyanyuk banua kadada ikam

Naun dasar undas babanaran undas

ramuk rapai bila balawan lawan inya

sastra hampai kabudayaan Banjar

kami naya liwar asa rangat hati 

tagal hudah jadi kalinjangan-Nya

ikam badahulu bulik kanu-Nya 

cukup hudah sangu sakalinya

bahara landang di tanah habang

du'a kami hamburakan gasan ikam

ma'atar mairingi hampai ka surga

baungahan lawan Allah Ta'ala

Di tangah ari aku taduduk taganang

humbayangan muha ikam cungul

balilihan baimbai banyu mataku

kami kahilangan undasnya

Paringin, 12 September 2024